5 (ПЕЙЦ) НАГРАДНИ КОНКУРСИ КОЦУРСКЕЙ ЧУТКИ 2021

З оглядом на то же Орґанизацийни одбор Коцурскей чутки 2021 наишол на завидне одволованє спонзорох, як и на то же Тематски конкурс розписани прешлей яри мал вельке одволованє, Орґанизацийни одбор КЧ `21 принєсол одлуку о розписованю аж пейцох наградних конкурсох.
Перши музични и одноши ше на змаганє у шпиваню гумористичних шпиванкох. Можу ше шпивац а капела, наживо або онлайн (зоз посиланьом видео-клипу), соло, дуо або трио, караоки, на матрицу и подобно. Аудиция ше отримує три тижнї у новембру – 14, 21. и 28. новембра од 18 по 22 годзин у Дому култури Коцур.
Други театрални и одноши ше на найуспишнєйше виведзени скеч або стенд-ап наступ. Скечи/Стенд-апи ше можу послац онлайн (зоз посиланьом видео-клипу) по 21. новембер або зоз наступом у Велькей сали Дому култури Коцур на Централней манифестациї 12. децембра.
Треци подобови. Теми: 1. Ламачка 2021; 2. Гумористично-сатирична манифестация Коцурска чутка. Роботи ше придаваю Орґанизацийному одбору по 28. новембер.
Штварти ше одноши на змаганє у правеню чардака од чуткох. Пре пандемийну ситуацию, змаганє у тим традиционалним дзецинским бависку отрима ше даскельо днї пред Централну манифестацию а публики будзе приказане на видео-биму 12. децембра у Велькей сали Дома култури Коцур и, розуми ше, на шицких дружтвених мрежох.
Пияти ше одноши на традиционалне змаганє Коцурскей чутки – на вибор найдлугшей чутки тогорочней ламачки. Чутки-кандидати ше приноша до Дому култури по 28. новембер. Меранє чуткох тиж будзе приказано на видео-биму у Велькей сали Дома култури и дружтвених мрежох.
Найлєпши на каждим зоз пейцох обявених конкурсох виберу одвитуюци фахово жириї, а награди дотичним буду уручени на Централней манифестациї остатнього викенду у новембру.

У Коцуре, 12. децембра 2021.
Проф. др Михайло Фейса, предсидатель Орґанизацийного одбору Коцурска чутка 2021