ПРОФЕСОРОВИ РАМАЧОВИ НА ЧЕСЦ

Дня 10. децембра 2021. року Оддзелєнє за русинистику Филозофского факултета орґанизує Медзинародну наукову конференцию Живот и дїло проф. др Юлияна Рамача з нагоди його 80-рочнїци народзеня.
Пре процивпандемийни мири на Конференциї наживо можу участвовац коло 20 особи. Шицки други учаснїци/учаснїки годни участвовац онлайн.
Модлїме заинтересованих же би свойо роботи приявели на e-адресу проф. др Михайла Фейси (mihajlo.fejsa@ff.uns.ac.rs, fejsam@gmail.com) по 5. децембер. Понеже ше планує и публикованє кнїжки абстрактох, за прияву потребне послац наслов, кратки абстракт и ключни слова.
Програма Конференциї и линк за приступ буду послани благочасово. Модлїме шицки учаснїци / шицких учаснїкох же би свойо викладаня конциповали на тирванє од 10 по 15 минути.
Роботи зоз Конференциї буду публиковани у Зборнїку на чесц проф. др Юлияна Рамача 2022. року. Треба же би були порихтани по упутству за пририхтованє рукописох за друкованє у наукових часописох Филозофского факултета у Новим Садзе (оп. напр. ГОДИШЊАК , б. 285-295; РУСИНИСТИЧНИ СТУДИЇ, б. 173-178).

Проф. др Михайло Фейса, порядни професор за узшу наукову обласц Русинистика – руски язик, главни редактор Зборнїка на чесц проф. др Юлияна Рамача (тел. 062 590 341)